Туркия ҳукумати Германиянинг Bild нашри фотосуратчисини мамлакат ҳудудига киритмади.

Нашрнинг ёзишича, келиб чиқиши грециялик бўлган Гиоргос Мутафис Истанбул аэропортига келганида паспорт назоратидан ўта олмаган. У Истанбулдан Ливияга ўтмоқчи бўлганди. Лекин у Афинага қайтишига тўғри келган.

"Паспорт назоратидагилар менинг номим қандайдир рўйхатга тиркалгани ва Туркияга кира олмаслигим ҳақида айтишди. Улар аввалига, куннинг бошида паспортимни олишди ва уни фақат кун охирида қайтаришди. Тунни терминалда ўтказишимга тўғри келди. Мен бундай рўйхатга нима учун кириб қолганимни айтишмади", деган Мутафис.

Кейинги йилларда Гиоргос Мутафис Сурия ва Ироқда бўлган, қочқинларнинг ҳаёти ҳақида бир қанча муваффақиятли репортажлар уюштирганди. У Reuters агентлиги, Time, Newsweek журналлари ҳамда Al Jazeera ва CNN телеканалларига ҳам ишлайди.

Бунда олдинроқ, 23 апрель куни0 Нидерландиядаги Metro нашрида шарҳловчи бўлиб ишлайдиган Эбру Умар Измир вилояти, Кушадаси шаҳридаги уйида ҳибсда олинганди. Бунга журналистнинг Туркия президенти Ражаб Тоййиб Эрдўғонга танқидий муносабати сабаб бўлиши мумкинлиги тахмин қилинган.

25 апрель куни журналистнинг қўйиб юборилгани ҳақида хабар берилди.