Сеулда Хитой, Жанубий Корея ва Япония вакиллари ўртасида Арктика минтақасида ҳамкорлик қилиш масалаларига бағишланган музокараларнинг илк давраси бўлиб ўтади, деб хабар қилмоқда РИА «Новости» агентлиги Жанубий Корея ТИВга таянган ҳолда.

Унда, ХХР ташқи ишлар вазирлиги шартнома-ҳуқуқий департаменти раҳбари ўринбосари Ма Синьминь, Япониянинг Арктика масалалари бўйича махсус вакили Кадзуко Сираиси ва Ж.Корея ТИВнинг Арктика бўйича махсус вакили Ким Чхан У қатнашади.

Уч мамлакат вакиллари, ҳукуматларининг Арктика минтақасидаги фаолияти ва сиёсатига доир маълумотлар билан ўртоқлашади, шунингдек, Арктика минтақасига оид мулоқот йўналиши ва уни кенгайтириш имкониятларини кўриб чиқишади.

Маълумки, РФ ҳарбий денгиз кучлари Арктика ва дунё океанидаги ҳарбий кучларини кўпайтирган. Айни вақтда 100 дан ортиқ рус сувости ва бошқа турдаги ҳарбий кемаси жаҳон сув ҳавзаларида фаолият юритади.