25 апрель оқшомида футбол бўйича Италия А Сериясининг 35-тур учрашувлари доирасида яна 3та учрашув ўтказилди.

Шу куни турнир жадвалида охирги поғонада жойлашган «Верона» жамоасининг тақдири ҳал бўлди, жамоа келаси мавсумни мамлакатнинг Б Сериясида ўтказади.

«Верона» аввалига ўз учрашувини ғалаба билан якунлади, «Милан»га қарши баҳс якунида гол урилиб, (2:1)жамоанинг умиди сақланиб қолди.

Аммо, бироз кейинроқ бўлиб ўтган «Карпи» ва «Эмполи» баҳсида мезбонлар 1:0 ҳисобида ғалаба қозониб, 17-ўринда қолди ва вероналиклар жамоага ета олмаслиги аниқ бўлди.

«Верона» 35-турдан кейин 25 очко тўплади ва чемпионатни тарк этган биринчи жамоа бўлди. «Карпи» эса 35 турдан кейин очколари сонини 35тага етказди (17-ўрин). «Эмполи» эса лигада қолиш масаласини анча олдинроқ ҳал қилган (42 очко, 11-ўрин).

35-турдан кейин нафақат қуйи лигага тушиб кетган илк жамоа номи, балки мамлакат чемпиони ҳам аниқланди. 25 апрель кунги ўйинларнинг биринчисида «Рома» «Наполи»ни 1:0 ҳисобида енгди ва «Ювентус»нинг муддатидан олдин чемпион бўлишини таъминлади.

Энди қолган 3 турда ЕЧЛ ва Европа Лигасида кейинги мавсум қайси жамоалар ўйнаши ҳамда яна қайси 2 жамоа Б серияга равона бўлишига ойдинлик киритиб олинади.

«Милан» клуби кучли тўртликдан анча ортда. «Верона»дан қабул қилиб олинган мағлубиятдан кейин жамоанинг Европа Лигасида иштирок этиш имконияти ҳам хавф остида қолди. 35-турдан кейин миланликлар 53 очко билан А сериянинг олтинчи ўриндаги жамоаси бўлиб турибди, 7-поғонадаги «Сассуоло» ҳисобида 52 очко бор.

Олдиндаги уч тур давомида 32 очкога эга «Палермо» ҳамда 30 очкоси бор «Фрозиноне» клубларининг натижалари А Серияда қайси жамоа қолиши масаласини ҳал қилади.

Италия А серияси
35-тур беллашувлари
25 апрель, душанба

«Верона» — «Милан» 2:1
Голлар: Жереми Менез, 21 (0:1). Жампаоло Паццини, 72-пен (1:1). Лука Силигарди, 90+5 (2:1).

«Карпи» — «Эмполи» 1:0
Гол: Кевин Ласанья, 85 (1:0).
Четлатишлар: Леван Мчедлидзе, 25 (Э). Лоренцо Лолло, 90 (К).

Италия А Сериясида 35-тур учрашувлари ўтказилди