Бангладеш ҳудудида фаолият олиб борувчи "Ансор ал-Ислом" террористик гуруҳи АҚШ Халқаро тараққиёт агентлиги (USAID) ходими, АҚШнинг Бангладеш пойтахти Дакка шаҳридаги элчихонасида ишлаб келган Зулҳаз Мэннаннинг ўлими учун жавобгарликни ўз зиммасига олган. Бу ҳақда АҚШдаги нодавлат ташкилоти бўлмиш SITE маълум қилган.

Маълум қилинишича, бу гуруҳ "Ал-Қоида" билан алоқадор ҳисобланади.

Бундан олдинроқ, Оқ уй ҳузуридаги Миллий хавфсизлик кенгашининг расмий вакили Нед Прайс 25 апрель куни Даккада экстремистлар томонидан ўлдирилган америкалик АҚШ элчихонаси вакили экани ҳақидаги маълумотни тасдиқлаганди.

Бангладеш полицияси диний экстремистлар 25 апрель куни Даккадаги Мэннан яшайдиган уйга хат ташувчи сифатида ниқобланиб, қуролланган ҳолда бостириб киргани ҳамда уй эгаси ва унинг ёнида бўлганларга ҳужум қилиб, 2 кишини сўйиб ташлашгани ҳақида хабар қилганди. Уйдагилардан яна бири жароҳатланган. Мэннан билан бирга мамлакатдаги жинсий озчилик манфаатларини ёқловчи нашр муҳаррири ўлдирилган.