Мамлакатнинг бир неча вилоятларида мавсумий табиий офат, сел келиши кузатилган. Сурункали ёмғир ёғиши натижасида Ўш, Жалолобод, Чуй ва Боткен вилоятларига жиддий талофатлар етган, деб хабар қилган «24.kg» агентлиги фавқулодда вазиятлар вазири Кубатбек Бороновдан иқтибос келтирган ҳолда.

Унинг сўзларига кўра, жиддий зарарланган уйлар, жабрланганлар ёки қурбонлар йўқ.
«Республика иқтисодиётига етказилган зарар 7,314 миллион сомни ташкил этган. Яроқсиз ҳолга келган бино ёки иншоотлар мавжуд эмас», — деган вазир.

Унинг қўшимча қилишича, айни вақтда каналларни тозалаш, йўлларни таъмирлаш ишлари олиб борилмоқда.

«Жабрланганларга алоҳида ёрдам кўрсатиш зарурати йўқ. Кимнидир кўчириш ёки янги уй қуриш ҳам шарт эмас. Баъзи уйларнинг ертўласи сув билан тўлган, аммо бино конструкцияси бутун», — деб маълум қилган Кубатбек Боронов.

Шу билан бирга, унинг айтишича, ажратилаётган маблағлар вазирлик фаолиятига етарли эмас. Хусусан, 2016 йилда давлат бюджетидан вазирлик эҳтиёжининг 40-41 фоизи ажратилган. Бу рақам 2015 йилда 39 фоиз, 2014 йилда 37 фоизни ташкил этган.