Украинанинг Одесса вилояти раҳбари Михаил Саакашвили Украинада давлат таназзулга учрашининг барча аломатлари кўринаётганини айтди. Саакашвили Украина президенти Пётр Порошенкога бу ҳақдаги мурожаати видеоёзувини Facebook’даги саҳифасида жойлаштирди.

Саакашвили шундай тарзда Одесса сиёсий ҳаётида юз бераётган охирги воқеаларга, жумладан шаҳар раҳбарияти тарафдорлари ва унга қарши чиқаётганлар орасида шаҳар мэрияси олдидаги тўқнашувларига изоҳ берди. Саакашвили мамлакат раҳбаридан Одессага Миллий гвардия ва полиция бўлинмаларини киритишни сўради.

26 апрелда Одессанинг амалдаги раҳбариятига қарши норозилик намойиши иштирокчилари 26 апрелга ўтар кечаси уларга ҳужум амалга оширилгандан кейин мэрия биносини қуршаб олишган. Фаоллар мэриянинг барча эшикларини автомобиль покришкалари, чиқинди идишлари ва темир тўсиқлар билан тўсиб ташлашган. Улар, шунингдек, мэрия биносига кириш мумкин бўлган ертўлага эга хиёбонга олиб борувчи дарвозаларга занжир ва қулф осиб қўйишган.

Намойишчилар Одесса мэри Геннадий Трухановнинг истеъфога кетишини талаб қилишган.

11 апрелда Одесса вилояти губернатори Михаил Саакашвили Трухановга қарши жиноий иш қўзғатишни талаб қилган. У, шунингдек, мэрни айирмачи деб атаган ва бунинг исботи сифатида мэр гўёки ошфор корхоналар ва Россия фуқаролигига эгалигини айтган.

4 апрелда Одесса вилояти губернатори ўринбосари Александр Боровик Одесса мэри Труханов ва Одесса шаҳар кенгашининг ярим депутатлари Россия фуқаролари эканлигини айтган. "Хавфсизлик хизмати томонидан тезкор йўл билан кенгашдаги 29 депутат, жумладан мэр Россия фуқароси эканлиги аниқланган", деб айтганди Боровик.