Миср "Мистраль" вертолёт ташувчи кемаларидан ечиб олинган Россия ускуналарини сотиб олмоқчи. Россия ва Миср бу масалани кўриб чиқишмоқда, деб маълум қилди "Интерфакс" ахборот агентлигига Миср мудофаа вазири ўринбосари Муҳаммад Ал-Қашқий.

Россия 2011 йилда Францияга "Мистраль" кемалари қуриб бериш учун буюртма берган, бироқ 2014 йилда Париж кемаларни сотишни Украинадаги вазият сабабли музлатиб қўйган. 2015 йил августида Владимир Путин ва Франция президенти Франсуа Олланд кемаларни қуриш ва етказиб бериш бўйича шартноманинг амал қилишини тўхтатишга ва Россияга шартнома бўйича тўланган пуллар ҳамда етказиб берилган Россия ускуналари ва материалларини қайтариб берилишига келишиб олганлар.

Шундан кейин Россия бош вазири ўринбосари Дмитрий Рогозин Россия Францияга кемалар учун тўлаган пулидан 3 баробар кўпроқ пул ундириб олганини маълум қилган.

Маълум қилинишича, шартноманинг бекор қилиниши Францияга 1 млрд долларга айланган.

Россия президенти маъмурияти раҳбари Сергей Иванов Қоҳира кемалар учун 1 млрд доллардан кўпроққа Россия вертолётлари ва ускуналари сотиб олиши мумкинлигини айтган.