Россия коммунистик партияси депутатлари Валерий Рашкин ва Сергей Обухов мамлакат президенти Владимир Путин, ташқи ишлар вазири Сергей Лавров ва мудофаа вазири Сергей Шойгуларга қилган мурожаатида, Лурдесдаги радиоэлектрон маркази фаолиятини қайта тиклаш ҳамда Кубада ракета мажмуаларини ўрнатиш таклифини илгари суришди. Депутатларнинг фикрича, Россия ва коллектив хавфсизлик шартномаси ташкилотидаги иттифоқчилари манфаатларини ҳимоя қилиш учун шундай чоралар кўриш лозим, деб хабар қилмоқда РИА «Новости» агентлиги.

Уларнинг сўзларига кўра, АҚШ май ойидаёқ Туркия жануби-шарқида HIMARS русумидаги ракета учириш ускуналарини жойлаштириш ниятида. Бу ҳақда Reuters ахборот агентлиги хабар тарқатган эди.

«Ушбу қурилма ёрдамида 500 км.лик масофага ракета зарбаси бериш мумкинлиги эътиборга олинса, коллектив хавфсизлик шартномаси аъзоси Арманистон хавф остида қолади».

Депутатларнинг айтишларича, Россия ва иттифоқчиларининг манфаатларини ҳимоя қилиш мақсадида АҚШ хатти-ҳаракатларига муносиб жавоб бериш керак. Хусусан, HIMARS каби ёки ундан кучлироқ ракета мажмуаларини Кубада жойлаштириш мақсадга мувофиқ бўлар эди.

«Бундан ташқари, Ҳавана шаҳри яқинидаги Лурдес радиоэлектрон марказини қайта тиклаш ҳам Вашингтон сиёсатига жавоб бўларди», — деб қайд этишган Россия Давлат думаси аъзолари.

«Россия жаҳон сиёсий майдонида ўзини буюк давлат сифатида намоён этаётган паллада, иттифоқчилар билан барбод бўлган ҳарбий ва иқтисодий алоқаларни қайта тиклаши лозим. Бу биринчи галда биродар Куба Республикасига оид», — дейилади депутатлар мурожаатида.