2015 йилнинг ноябрида содир этилган Париж терактлари ижрочилигида гумон қилиниб, ҳибсда сақланаётган террорчи Салоҳ Абдислом Францияга экстрадиция қилинди. Бу ҳақда Бельгия прокуратураси маълум қилган.

Бельгиядаги нашрларда ёзилишича, уни французларга топшириш амалиёти чоршанбага ўтар кечаси махфий тарзда амалга оширилган.

Бельгияда туғилган, келиб чиқиши франциялик бўлган 26 ёшли Салоҳ Абдислом 130 кишининг ўлимига сабаб бўлган терактларни уюштирган ва гу вақтгача омон қолган икки кишидан бири ҳисобланади.

У портлашлар вақтида Парижда бўлганини инкор этмаган.

У шунингдек, терактлар ташкилотчиларидан бири ҳисобланади. Полиция тахминига кўра, у охирги лаҳзада ўзинини портлатишни истамаган.

Адвокат Свен Марининг айтишича, унинг мижози Бельгия ва Франция полицияси билан ҳамкорлик қилишга рози бўлган.

"Унинг кўрсатмалари олтиндан қиммат бўлиши мумкин", деган Мари.

Абдислом 18 март куни Брюссель яқинида қўлга олинганди. Унинг қўлга олинишидан 4 кун ўтиб, Брюссель аэропорти ва метросида терактлар амалга оширилди. Бу портлашлар туфайли 35 киши ҳалок бўлиб, 300дан ортиқ киши жароҳатланди. Лекин Бельгия ҳукумати бу терактлар ўртасида боғлиқлик йўқлигини билдирди.

Абдислом билан бирга яна 4 киши Париж терактларига алоқадорликда гумон қилиниб, қўлга олинганди.

Аввалига у ўзини Франция ҳукуматига топширишларига розилик билдирмади, аммо кейинроқ ўз фикрини ўзгартирди. Адвокатнинг изоҳлашича, унинг мижози Франция ҳукуматига барчасини изоҳламоқчи.