Россия мудофаа вазири Сергей Шойгу Халқаро хавфсизлик бўйича V Москва конференциясида қилган чиқишида, Сурия президенти Башар Асад ҳокимиятдан четлатилган тақдирда ҳам мамлакатдаги қон тўкилишларга барҳам берилмайди, деган фикрни билдирди.

«Ғарб ҳамкасбларимизнинг: "Башар Асад кетса, Суриядаги қон тўкишлар ўз-ўзидан барҳам топади, АҚШ етакчилигидаги коалиция эса Россияни қўллаб-қувватлайди", деган фикрларини кўп эшитамиз», — деган Россия мудофаа вазири.

Аммо, унинг айтишича, бу каби «яхши ниятлар»га негадир ишониш қийин.

«Ҳақли савол туғилади: Ироқда Саддам Ҳусайн, Ливияда Муаммар Қоззофий бошқарувига барҳам берилганидан сўнг, ким у ерларда тинчлик ўрнатиш ва тартибни таъминлашга халақит қилди?» — деб қайд этган Россия мудофаа маъмурияти раҳбари.

Бундан аввал, ОАВда Эрон раҳбарияти Башар Асад ва унинг оиласига бошпана беришга тайёрлиги хусусида хабарлар пайдо бўлганди. Расмий Теҳрон Асадга у ердан Суриядаги ҳарбий кампаниясини бошқариш учун имконият яратилишига ваъда берган.