Венесуэлада ташкилотлар ва корхоналар томонидан электр энергиясини тежашнинг антиқа усули ўйлаб топилди. Мамлакат вице-президенти Аристобуло Истуриснинг маълум қилишича, шу мақсадда жорий қилинаётган янги иш тартибига кўра, давлат хизматчилари ҳафтанинг душанба ва сешанба кунлари ишга келишади холос.

Бундан аввал, Венесуэла ҳукумати жума кунини ҳам дам олиш куни деб эълон қилган, электр энергия узатишни даврийлаштирган ҳамда соат милларини 30 дақиқа олдинга сурган эди. Буларнинг барчаси, мамлакатдаги электр таъминоти билан боғлиқ муаммоларга қарши чоралар сифатида амалга оширилганди.

"Давлат идора ва ташкилотлари учун жумадан ташқари чоршанба ва пайшанба кунларини ҳам дам олиш куни деб белгилашга қарор қилинди. Халқ таълими муассасалари ҳам шу кунларда ишламайди", — дея Истурис сўзларини келтиради El Nacional портали.

Хабарларга қараганда, "Эль-Гури" ГЭСдаги мамлакатнинг энг йирик сув омборида сув сатҳи энг қуйи кўрсаткичга тушиб кетган. Энергетика вазири Луис Мотта Домингеснинг маълум қилишича, ҳозирда унинг сатҳи 241,6 метрни ташкил этмоқда. Бунгача у 2003 йилда 244 метргача пасайган эди. Ҳукумат вакиллари "Эль-Ниньо" иқлим кўринишини сув сатҳи пасайишининг асосий омили, деб айтишмоқда.

Умуман, сўнгги йилларда Венесуэла электр таъминотида кенг қамровли узилишлар бўлиши одатий тусга кириб қолган. Бу ҳолат, айниқса, иссиқ мавсумда кўпроқ кузатилади. Венесуэла электр энергетика соҳаси Уго Чавес даврида миллий мулкка айлантирилиб, давлат ҳисобига ўтказилганди.