Иккинчи жаҳон урушида жасорат кўрсатган, оловли майдонларда ўз юртининг тинчлиги ва озодлиги, оиласи, фарзандларининг хотиржамлиги учун курашган инсонлар мудом халқимиз ардоғида. Беаёв жангларда жон фидо қилган боболаримиз хотираси қалбларимизда абадий яшайди. Бугун орамизда яшаётган 6 мингдан зиёд иккинчи жаҳон уруши қатнашчисига давлатимиз томонидан ҳар томонлама эътибор ва ғамхўрлик кўрсатилмоқда. Ҳар йили, жумладан, жорий йилнинг 18 апрелида «Иккинчи жаҳон уруши қатнашчиларини рағбатлантириш тўғрисида» Ўзбекистон Республикаси Президенти Фармонининг эълон қилиниши ҳам шундан далолатдир.

Президентимиз Ислом Каримов мудҳиш ва аёвсиз урушнинг такрорланмаслиги учун унинг илдизлари яна униб чиқишининг олдини олиш ҳозирги вақтда энг долзарб, энг муҳим муаммо бўлиб қолаётганига жиддий эътибор қаратмоқда. «Дунёнинг кўпгина минтақаларидаги қарама-қаршилик, қуролли тўқнашувлар, қонли фожиалар, ён атрофимиздаги нотинч аҳвол, аввало, Афғонистонда 35 йилдан зиёд вақт мобайнида давом этаётган таҳликали вазият Ватанимизни ҳар қандай бало-қазолардан асраш учун сезгир ва доимо огоҳ бўлиб яшашимизни талаб қилади», деган фикрлари табиийки, ўз оиласини, фарзандларини эртанги куни ҳақида ўйлайдиган ҳеч бир юртдошимизни бефарқ қолдирмайди.

Шундан келиб чиққан ҳолда, 27 апрель куни Республика маънавият тарғибот маркази томонидан ҳамкор ташкилотлар билан биргаликда Тошкент ахборот технологияларида «Ўзбек халқига тинчлик керак, омонлик керак!» мавзусида маънавий-маърифий тадбир ташкил этилди. Тадбирни ташкил этишдан мақсад: талаба-ёшларни ватанпарварлик руҳида тарбиялаш, уларда кексаларни эъзозлаш, тарихни билиш, миллий ўзликни англаш фазилатларини шакллантириш, узоқни кўзлаб, ён-атрофимиздаги, дунёдаги вазиятни холисона таҳлил қилиб, биринчидан, бугун қандай мураккаб ва таҳликали замонда яшаётганимизни англашда ёшларга кўмак бериш, иккинчидан, уларнинг мафкуравий иммунитетини мустаҳкамлаш, учинчидан эса, илмли, масъулиятли, интизомли, ватанпарвар ва фидойи мутахассисларни тарбиялашда амалга оширилиш лозим бўлган вазифаларни яна бир бор таҳлил қилишдан иборатдир.

Тадбирда Республика Маънавият тарғибот маркази вакиллари, университет раҳбарияти ва талабалари, халқимиз ардоғидаги театр ва кино актёрлар, шоирлар ва оммавий ахборот воситалари ходимлари иштирок этишди.