Дортмунднинг «Боруссия» жамоаси Матс Ҳуммельс билан боғлиқ вазият бўйича баёнот берди.

Рур клуби футболчи раҳбариятни ўзининг мавсум якунлангач «Бавария»га ўтишни режалаштиргани ҳақида огоҳлантирганини тасдиқлади. Бу трансфернинг амалга ошиши мюнхенликлар томонидан билдириладиган таклифга боғлиқ бўлади. Ҳозирча «Боруссия» «Бавария»дан расман таклиф олмаган.

Дортмундликлар клуби мурожаатида Ҳуммельснинг шартномасида унинг кетиши учун талаб қилинадиган маблағ миқдори кўрсатилмагани айтилган.

27 ёшли бу футболчининг «Боруссия» билан шартномаси 2017 йилнинг ёзига қадар тузилган.

Бундан олдинроқ, Ҳуммельс «Бавария» билан 4 йиллик шартнома тузиш хусусида келишувга эришгани ҳақида хабар берилганди. Унинг янги жамоасидаги маоши йилига 10 миллион еврони ташкил этиши айтилган.

Маълумот учун, Ҳуммельс асли «Бавария» клуби тарбияланувчиси бўлиб, у 2008 йилда «Боруссия»га ўтганди.