Cadillac’нинг янги модели Mercedes-Benz CLA ва Audi A3 билан харидорлар учун курашиши кутилаяпти. У сўнгги авлод Chevrolet Cruze’нинг олдетакчи платформаси асосида ишлаб чиқилади. Бу ҳақда ўз ички манбаларига таянган ҳолда GM Inside News хабар қилмоқда.

Лойиҳа D2JL индекси билан белгиланган. Бунда D2 Delta’нинг 2 авлод шассисини англатади. J – хетчбекни, L – ҳарфи эса янгилик Cadillac учун мўлжалланганини билдиради.

GM Inside News’нинг қайд этишича, ҳозирча Cadillac’дагилар қанақа беш эшикли машина – хэтчбек ёки Chevrolet Volt’нинг сўнгги авлодига ўхшаш лифтбек ишлаб чиқарадими, номаълум.

Шу нарса аниқки, янгилик икки хил: 1,5 ва 2,0 литрлик бензинли турбомотор билан ишлаб чиқилади. Кучлироқ двигатель моделнинг қимматроқ тўпламларига ўрнатилади. Уларнинг иккиси ҳам саккиз диапазонли автоматик узатмалар қутиси ёрдамида ҳаракатга келади.

General Motors’нинг тахминига кўра, янги маҳсулоти Chevrolet Cruze’га нисбатан 6-9 минг долларга қимматроқ бўлади. Аммо у қачон бозорда пайдо бўлиши аниқ эмас.

Бундан аввал, Cadillac бренди Mercedes-Benz CLA билан рақобат қила оладиган машина устида иш олиб бораётгани ҳақида хабар қилинган эди. У орқа томони етакчи бўлган Alpha платформасида ишлаб чиқилиши айтилганди. Айни шасси ATS ва CTS’ларнинг сўнгги авлодларида қўлланилган.