Туркия ва Қатар энергетика соҳасидаги ҳамкорликни ривожлантирмоқчи. Анқара Қатардан суюлтирилган табиий газ сотиб олиш бўйича келишув имзоламоқчи. Бу ҳақда Қатарга ишчи ташриф билан келган Туркия бош вазири Аҳмад Довудўғли маълум қилган.

"Давлатларимизда энергетика соҳасида ҳамкорлик қилиш бўйича кенг имкониятлар мавжуд. Биз электр энергиясига катта талаб мавжуд бўлган мамлакатмиз. Қатар эса шундай маҳсулотлар ишлаб чиқарадиган мамлакат. Бизда катта бозор мавжуд, Қатарда эса катта салоҳият. Шунингдек, суюлтирилган табиий газ терминаллари барпо этиш учун жозибали шароитлар мавжуд. Биз бу имкониятларни баҳолашимиз керак", дейди Довудўғли Доҳадаги матбуот анжуманида.

У шунингдек, икки давлат эркин савдо бўйича келишув тузишни режалаштиргани ҳақида айтган.

"Бизнинг мақсадимиз эркин савдо бўйича битим имзолаш. Биз Қатар билан товар айирбошлаш ҳажмини 5 млрд долларга етказмоқчимиз. Икки давлатнинг иқтисодиёти бир-бирини тўлдира олади. Қатарга нима етишмаса, Туркия етказиб беради. Ёки аксинча", дейди Туркия бош вазири.