Нидерландия ҳукумати яқин икки йил ичида бошпана излаб юрганлар интеграцияси учун қўшимча 700 миллион евро ажратади. Бу ҳақида Нидерландиянинг телерадио корпорацияси хабар беради.

Телеканал маълумотига кўра, маблағлар қочқинларнинг таълими, тил ўрганиши ва бошқа эҳтиёжларига сарфланади. Мазкур пулларнинг ажратилиши Нидерландия муниципалитет ассоциацияси ҳамда мамлакат ҳукумати ўртасида имзоланган битимнинг бир қисми ҳисобланади.

Мазкур битимни тузишдан кўзланган асосий мақсад, қочқинлар голландлар жамиятига тезроқ мослашиб кетиши, яъни турар-жой топилиши биланоқ дарҳол иш билан таъминланишига яқиндан кўмак беришдир. Бунинг учун эса улар ҳолланд тилини ҳеч бўлмаганда бошланғич босқичида билишлари зарур бўлади. Уларнинг фарзандлари ҳам ота-оналари турар-жой билан таъминлангунига қадар мактабларда таҳсил олиш имконига эга бўлишади.

Ўз ўрнида шаҳар ҳокимияти мамлакатда яшаш ҳуқуқини олган инсонларга кўпроқ жамоат уйларини тақдим этиш ишлари билан шуғулланмоқда. Бу эса марказий ҳудудларда уй ахтариб юрган қочқинларни вақтинчалик камайтиришга ёрдам беради.

Мазкур маблағлар Ташқи савдо ва ҳамкорликни ривожлантириш вазирлиги томонидан қочқинларга йўналтирилган ижтимоий кўмак воситаларига қўшимча бўла олади. Маълумотларга кўра, 2015 йилда идоралар турар-жой излаб юрган инсонлар учун (уларнинг аризаларини кўриб чиқиш, уй ва озиқ-овқат билан таъминлашга) 1,3 млрд еврога яқин харажат қилган.