Жанубий Кореянинг Hyundai компанияси 2018 йилда бутунлай электрмоторда ишлайдиган кроссоверни ишлаб чиқишни режалаштирмоқда. Бу ҳақда компаниядаги манбасига таянган ҳолда The Korean Herald газетаси ёзмоқда.

Янги йўлтанламасни ишлаб чиқишга оид тадқиқот ишлари Hyundai’нинг Намьянгдаги илмий-тадқиқот марказида бошланиб кетган. Унинг батареялари бир марта қувватлантирилгач, 320 км.гача масофани босиб ўта олади. Бу эса Ioniq гибрид моделининг аккумулятор ёрдамида босиб ўтадиган масофасидан 2 марта кўпдир.

Toyota Prius’га рақобатчи бўлиши кутилаётган Hyundai Ioniq’нинг тақдимоти 2016 йил бошларида бўлиб ўтганди. Унинг куч агрегатига 105 от кучига эга 1,6 литр ҳажмли бензинли мотор ва 43,5 қувватли электр мотор киритилган. Бундан ташқари, тўпламга литий-полимер батареяси ва олтибосқичли «автоматик» узатмалар қутиси киради.

Февраль ойида бўлиб ўтган Чикаго автосалонида Kia Niro гибрид модели ҳам оммага намойиш этилганди. У ҳам Ioniq платформасида ишлаб чиқилган ва унинг куч агрегатлари ўрнатилганига қарамай, «Ниро» матбуот ҳамда жамоатчиликнинг кенг қизиқишини уйғота олди. Айни ҳолат, Hyundai келгуси электрокарини йўлтанламас сифатида ишлаб чиқиш борасида қарор қилишига омил бўлди.

Бундан аввал, Hyundai 2017 йилда янги авлод ёқилғисида ишловчи моторга эга машинани ишлаб чиқиши ошкор бўлганди. У, водородли кроссовер ix35 Fuel Cell ўрнини эгаллаши кутилмоқда.