2016 йилнинг биринчи чорагида Украина давлат бюджетидаги камомад  11 млрд гривна (мамлакат миллий банки жорий курси бўйича 436,16 млн АҚШ доллари)ни ташкил этган.

Бир йил муқаддам, давлат бюджетида 4,435 млрд гривналик (175,85 млн доллар) профицит қайд этилган эди. Бу ҳақда 28 апрель куни Украина молия вазирлигида маълум қилишди, деб хабар қилмоқда ТАСС агентлиги.

Украина давлат бюджетининг биринчи чоракдаги даромадлари 129,157 млрд гривна (5,121 млрд доллар), харажатлари 140,166 млрд гривна (5,56 млрд доллар)дан иборат бўлган. 2015 йил биринчи чораги билан таққосланганда давлат бюджети даромадлари 14,1 фоизга, харажатлари эса 28,9 фоизга ошган, дейилади молия вазирлиги ҳисоботида.

Украина давлат бюджети ўтган йилнинг 25 декабрида қабул қилинган эди. Унга кўра, 2016 йилги бюджет даромадлари бир йил аввалгисига қараганда 15,1 фоизга кўп бўлиб, 595,1 млрд гривнани ташкил этади. 2016 йилги давлат харажатлари эса, ўтган йилгига қараганда 14,5 фоиздан иборат бўлиши ва 684,5 млрд гривнага тенг бўлиши керак. Украина давлат бюджетида рухсат берилган камомад ЯММ (ялпи миллий маҳсулот)нинг 3,7 фоизини ташкил этиши керак.