Ўтиб бораётган ҳафтада дунё бўйлаб инсонларни эмлаш ҳафталиги бўлиб ўтмоқда. У барча ёшдаги кишиларни турли хил оғир касалликларга қарши эмлашда ёрдам кўрсатиш мақсадида амалга оширилмоқда. Инсон иммунитетини махсус эмдорилар билан кучайтириш, миллионлаб инсонлар умрини сақлаб қолиши баробарида муваффақиятли ҳамда иқтисодий самарали чоралардан бири ҳисобланади.

Таъкидлаш жоизки, Ўзбекистонда барча болаларни тўлиқ эмлаш амалга оширилади. Мамлакатдаги болалар сони 10 миллионни ташкил этади, уларнинг қарийб 100 фоизи турли оғир хасталикларга қарши эмланади.  Мамлакат ҳукумати, болалар муассасалари, ногирон ва узоқ аҳоли пунктларида истиқомат қилувчи барча болаларни эмлаш жараёни билан қамраб олишни режалаштирган.

Шу билан бирга, мамлакатдаги барча эмлаш воситалари ва эмдорилар давлат маблағлари ҳисобига харид қилинади. Болалар ва катталарни тўлиқ эмлашни таъминлаш мақсадида ЮНИСЕФнинг Ўзбекистондаги ваколатхонаси вакциналар харид қилишда Республика соғлиқни сақлаш вазирлигига амалий кўмак бериб келади.