American Idol ҳамда So You Think You Can Dance телекўрсатувлари асосчиси Core Media Group компанияси банкротга учраганини эълон қилди. Бу ҳақда The New York Times хабар берди.

Калифорниядаги компания ўз қарзини 512 млн долларга, активларини 73 млн долларга баҳолаган.

Телекўрсатувлар рейтингининг тушиб кетиши ва Coca-Cola ва AT&T каби йирик ҳомийларнинг ҳамкорликни тўхтатиши банкротликка сабаб бўлди. Шунингдек, Walt Disney World кўнгилочар боғидаги American Idol аттракционлари ҳам ёпилди.

2014 йили American Idol келтирадиган фойда бир йил аввалгидан кўра 15 миллион долларга камайди. 2015 йилнинг биринчи ярим йиллигида эса бу кўрсаткич яна 35,6 миллион долларга тушиб кетди.

Компаниянинг собиқ ижрочи директори Саймон Фуллер ҳужжатларда энг кам таъминланган кредитор сифатида кўрсатилган. Унинг қарзи 3,3 миллион доллар.

American Idol шоуси 14 йил давомида эфирга узатилди ва бир ой аввал ёпилди.