Шимолий Кореяда ўтган йили ҳибсга олинган, АҚШнинг корейс миллатига мансуб фуқароси Ким Дон Чхол Шимолий Корея олий суди томонидан жосуслик қилиш айби билан 10 йиллик қамоқ жазосига маҳкум қилинди.

62 ёшли америкалик Шимолий Кореянинг шарқидаги Расон савдо-иқтисодий ҳудудида қўлга олинган. У бу ерда тадбиркорлик ва хайрия фаолиятида иштирок этишини рўкач қилиб, жосуслик фаолиятини олиб борган. Кейинроқ айбланувчи Жанубий Корея разведкаси топшириғи билан Шимолий Кореяда турли маълумот, жумладан ҳарбий характердаги маълумот йиғиш билан шуғуллангани, аҳоли орасидаги кайфиятлар, озиқ-овқат бозорларидаги вазият ҳақида маълумотлар бериб турганини тан олган.

Ким Дон Чхоль "Шимолий Кореяга қарши мудҳиш жиноят қилганини, жумладан Пхеньянга қарши ёвуз ташқивот олиб борганини тан олди ва қилмишлари учун узр сўраб, унга раҳм-шафқат кўрсатилишини илтимос қилган".

Прокурор қаттиққўлроқ ҳукм чиқарилишини талаб қилган, бироқ суд айбланувчининг терговга кўмак кўрсатгани, чин юракдан пушаймонлиги ва кекса ёшини ҳисобга олиб, юмшоқроқ ҳукм чиқарди.

Ким Дон Чхоль 19 ёшигача Сеулда яшаган, сўнгра АҚШнинг Виржиния штатига кўчиб ўтиб, шу ерда олий таълим ва АҚШ фуқаролигини олган.