Самарқанд вилоятининг Жума шаҳрида суд Эрондан наркотик моддалар олиб келишни йўлга қўйган жиноий гуруҳ аъзоларига 3 йилдан 14 йилгача озодликдан маҳрум этиш ҳукми эълон қилинди. Бу ҳақда суд вакилига асосланган ҳолда Sputnik агентлиги хабар берган.

Ушбу иш жиноий ишлар бўйича Пастдарғом туман суди томонидан кўриб чиқилган.

Манбанинг аниқлик киритишича, жиноий гуруҳ аъзолари Самарқанд вилоятининг Ургут туманида яшовчи фуқаролар ҳисобланади.

"Жиноий гуруҳ аъзолари Эрон фуқароларидан катта миқдорда афюн сотиб олиб, уларни темир йўл вагонлари хоналарида, шунингдек автомобиллар воситасида яширинча Ўзбекистон ҳудудига олиб кириш билан шуғулланишган", — деган суд вакили.

Тергов маълумотларига кўра, гуруҳ Ўзбекистон ҳудудида наркотиклар савдоси бўйича йирик тармоқ ташкил қилиш мақсадида ҳаракатланган. Шубҳали хатти-ҳаракатлар пайқалгач, гуруҳ аъзолари ортидан кузатув олиб борилган ва тез орада уларнинг барчаси қўлга олинган.

"Гуруҳ аъзоларининг уйлари тинтув қилинганида, 20 килограммга яқин қорадори ва катта миқдордаги нақд пул маблағлари топилган", дейди суд вакили.

Ўзбекистон ҳудуди орқали Афғонистондан наркотик моддалар олиб ўтиладиган йўналиш "шимолий йўналиш" деб аталади. Ҳар йили бу йўналиш орқали Россия ва Европа мамлакатларига 100 тоннадан ортиқ миқдордаги наркотик моддалар етказиб берилади.