Ўзбекистонда жорий йилнинг май-июнь ойларида бўлиб ўтадиган фуқаролар йиғинлари раислари ва уларнинг маслаҳатчилари сайловига Навоий вилоятида ҳам қизғин тайёргарлик кўрилмоқда. Бу ҳақда «ЎзА» хабар бермоқда.

Навоий вилоятида 343 нафар фуқаролар йиғини раиси ва уларнинг 3 минг 700 дан ортиқ маслаҳатчиси сайланади. Ўзбекистон Республикасининг “Фуқаролар йиғини раиси (оқсоқоли) ва унинг маслаҳатчилари сайлови тўғрисида”ги қонуни асосида кенг кўламли тайёргарлик ишлари олиб борилмоқда.

– Вилоят марказида 30 маҳалла фуқаролар йиғини мавжуд бўлиб, сайловларда 30 раис ва уларнинг 277 маслаҳатчиси сайланиши лозим, – дейди Навоий шаҳар фуқаролар йиғинлари раислари ва уларнинг маслаҳатчилари сайловини ташкил этиш ҳамда ўтказишга кўмаклашувчи комиссияси раиси Аҳрор Пирназаров.

Вилоятда сайловларни юксак савияда ташкил этиш ва ўтказиш, муқобиллик асосида номзодлар кўрсатишга алоҳида эътибор қаратилмоқда. Маҳалла аҳли ўзи ишонган, ташаббускор ва фидойи номзодни сайлаши учун барча шароит яратилмоқда.