Янги Зеландияда яшовчи аёл 67 йил муқаддам кутубхонадан олган китобини жуда кеч қайтарган бўлсада, жаримадан қутилиб қолди. Бу ҳақда The Guardian хабар берган.

Хабар қилинишича, исми сир тутилган аёл 1948 йили, ҳали мактаб ўқувчиси бўлганида Окленддаги кутубхонадан ўша вақтда машҳур бўлган "Маорилар ҳаётига оид мифлар ва афсоналар" номли китобни олганди. 28 апрель куни, олинган вақтидан 24 605 кун ўтиб у китобни кутубхонага қайтарган ва кечиккани учун узр сўраган.

"У китобни ҳали жуда кичиклигида олган ва ўтган давр давомида уни ортга қайтаришнинг йўлини қила олмаган. У жуда хижолат бўлди, лекин мен унинг ўтган 10 йиллар давомида у китобни бир неча марта қайта ўқиб чиққанини эшитиб хурсанд бўлдим", дейди кутубхоначи Зое Корнелиус.

Қайд этиш керакки, бундай кечикиш учун 17 минг доллар миқдоридаги жарима қўлланиши керак бўлади, аммо кутубхона маъмурияти аёлни кечиришга қарор қилган. У бола вақтида китобни олгани учун унга жарима қўлланмаган.