Венесуэлалик қутқарувчилар Эквадордаги зилзиладан 12 кундан кейин вайроналар остидан кекса ёшли эркакни тирик ҳолда чиқариб олишди. Бу ҳақда Венесуэланинг Эквадордаги элчихонаси сайтида маълум қилинди. 

Қутқарувчилар 72 ёшли Мануэл Васкесни 29 апрелда Харамихо аҳоли пунктини кўздан кечираётганларида топиб олишди. Таъкидланишича, эркак товуш чиқарган ва шу билан эътиборни жалб қилган.

Қария ташналик ва ориқлик билан шифохонага етказилган. Қариянинг чап оёғидаги бир нечта бармоғини олиб ташлашга тўғри келган. Унда, шунингдек, сурункули буйрак етишмовчилиги ва тўқималар некрози ҳам аниқланган.  

Эквадордаги 7,8 магнитудали зилзила 17 апрелга ўтар кечаси содир бўлди. АҚШ Геологик хизмати маълумотларига кўра, зилзила маркази Муисне аҳоли пунктидан 27 км узоқликда океанда бўлган, ўчоғи эса 19,2 км чуқурликда бўлган. Охирги маълумотларга кўра, фожиа оқибатида 659 киши ҳалок бўлган, 29 мингдан кўпроқ одам эвакуация қилинган.