"Лестер Сити" Англия Премьер-лигасида чемпионликни қўлга киритса, теленамойишларга ҳуқуқни сотишдан 93 млн фунт стерлинг (135,8 млн доллар) ишлаб олади. Бу ҳақда Mirror нашри хабар бермоқда.

АПЛнинг ҳар бир клуби ўз ўйинларига теленамойишларга ҳуқуқни сотишдан ўртача тахминан 54 млн фунт стерлинг (78,9 млн доллар) олади. Якуний қиймат жамоанинг мусобақа жадвалидаги ўрни ва унинг иштирокида жонли эфирда кўрсатилган ўйинларнинг сонига боғлиқ бўлади.  

Ўтган мавсум натижаларига кўра "тулкилар" чемпионатда 14-ўринни эгаллашганди ва 72 млн фунт стерлинг (105,2 млн доллар) олишган. Жорий мавсум бўйича бу қийматнинг ошиши Клаудио Раньери шогирдларининг чемпионлик унвонини қўлга кирита олишларига боғлиқ бўлади. Бундан ташқари, клуб Чемпионлар Лигасига чиқа олгани учун ҳам йирик мукофот пули олади.

"Лестер" чемпионатнинг 35-туридан кейин 76 очко билан пешқадамлик қилмоқда. "Тулкилар" 36-турда "Манчестер Юнайтед"га қарши учрашувда чемпионликни муддатдан аввал расмийлаштиришлари мумкин. Бунинг учун улар "МЮ"ни ютишлари керак бўлади.

Учрашув бугун, 1 майда "МЮ"нинг уй майдони "Олд Траффорд"да бўлиб ўтади ва Тошкент вақти билан 18:05 да бошланади.