«MYu» «Lester»ga «Old Trafford»da chempionlikni nishonlashga yo‘l qo‘ymadi

Angliya premer-ligasining 36-tur uchrashuvlari davom etmoqda. Bugunga belgilangan uchrashuvlarning ikkinchisida turnir jadvali peshqadami «Lester» «Manchester Yunayted» maydoniga safar qildi va orzular teatri «Old Traffor»da muddatidan oldin chempionlikni nishonlash imkoniyatidan foydalana olmadi.

O‘yinning dekadasidayoq mezbonlar hujumchisi Antoni Marsiyal hisobni ochdi.

17-daqiqada esa mehmonlar sardori Uesli Morgan jarima zarbasidan keyin boshi bilan De Xea darvozasini ishg‘ol qildi -- 1:1.

O‘yinning ikkinchi taymida muxlislar gol ko‘rishmadi. O‘yinning asosiy vaqti yakunlanishiga 4 daqiqa qolganida «Lester» yarimhimoyachisi Depayga ishlatgan qo‘polligi uchun maydondan chetlatildi. Hakam tomonidan qo‘shib berilgan 4 daqiqa davomida hisob o‘zgarmadi.

Endilikda, «Lester» hisobidagi ochkolar soni 77taga yetgan. Jamoa qayd etgan durang ikkinchi o‘rindagi «Tottenhem»da nazariy jihatdan chempionlik uchun kurash uchun imkoniyat qoldirmoqda. Londonliklar 36-turdagi uchrashuvini o‘tkazmagan holda 69 ochkoga ega. Jamoa 2 may kuni «Chelsi»ga qarshi derbida maydonga tushadi. Agar bu o‘yinda «Tottenhem» ochko yo‘qotsa, «Lester» avtomatik ravishda chempionga aylanadi.

Turning yana bir o‘yini «Sauthemtpon» va «Manchester Siti» o‘rtasida kechadi.

Bugungi durangdan keyin Lui van Gaal shogirdlari 60 ochko bilan beshinchi o‘rinda qolmoqda.

Angliya - Premer-liga. 36-tur
Manchester Yunayted (Manchester) – Lester Siti (Lester) – 1:1

Gollar: 1:0 – 8 Marsyal, 1:1 – 17 Morgan.
Manchester Yunayted – De Xea, Blind, Smolling, Roxo, Valensiya, Lingard (Mata, 62), Fellayni (Errera, 75), Kerrik, Marsyal, Runi, Reshford (Depay, 82).
Lester – Shmeyxel, Morgan, Fuks, Simpson, Xut, Drinkuoter, Kante, Marez (King, 88), Shlupp (Olbrayton, 77), Okadzaki (Grey, 67), Uloa.
Ogohlantirishlar: Lingard (53), Kerrik (57), Drinkuoter (58), Runi (66).
Chetlatish: Drinkuoter (86).