Суриянинг мухолиф "Сурия озод армияси" (СОА) таркибига кирувчи қуролланган гуруҳлар Суриянинг исталган ҳудудида ҳужумларга жавоб берувчи ягона ҳарбий блок яратилганини маълум қилишди

"Биз Сурия бўйлаб қуролланган отрядлар ягона блокни ташкил қиламиз, бизнинг бўлинмалар жойлашган ҳудудда амалга оширилган ҳужум Суриянинг бутун ҳудуди бўйлаб барча отрядларга қилинган ҳужумдек баҳоланади ва биз ўз ортимиздан бу ҳужумга жавоб бериш ҳуқуқини қолдирамиз", дейилмоқда СОАга кирувчи 37 та отряд имзолаган баёнотда. 

Ҳужжатда ўт очишни тўхтатиш тартиби деярли барбод бўлгани, ҳукумат кучлари эса жадаллик билан турли ҳудудларни, жумладан Ҳалабни бомбардимон қилаётганлари айтилган.

Аввалроқ СОА Ҳалабнинг ўққа тутилиши сабабли 30 апрелда Дамашқда бир суткага ва Латақияда 3 суткага киритилган "сукут тартибига" амал қилмаслигини айтган. Кейинроқ бу тартиб ижобий натижа бергани сабабли Дамашқда узайтирилди. Бу вақт давомида жанговар ҳаракатлар ва исталган турдаги қуролни қўллаш тақиқланади.   

СОА Сурияда ихтилоф бошлангандан кейин ташкил этилган ва мухолифатнинг жанговар қаноти ҳисобланади. Унинг асосини Башар Асадга қарши жанг қилганлар ва дезертирлардан иборат кўп сондаги тарқоқлашган жанговар гуруҳлар ташкил қилади. СОАнинг асосий мақсади Асад тузумини йўқ қилиш ҳисобланади. У БАА ва Туркиядан кўмак олади. Айни вақтда СОА Идлиб ва Ҳалаб вилоятлари ҳамда Сурия жанубидаги кичик ҳудудларни назорат қилади.