2 май куни Болтиқбўйи мамлакати Эстонияда НАТО альянсининг Spring storm номли йирик ҳарбий ўқув машғулотларига старт берилади. Унда 6 минг нафар ҳарбий хизматчи иштирок этиши режалаштирилган. Эстония мудофаа кучлари бош штаби маълум қилишича, ҳарбий машғулотлар 19 майга қадар давом этади.

Бош штаб маълумотларига кўра, унда альянсга аъзо ўнта давлат, жумладан, Нидерландия, АҚШ, Буюк Британия ва ГФР ҳарбийлари ҳам қатнашади. 

Айтиш жоизки, Spring storm манёврлари Эстониянинг Россия билан чегарадош шарқий уездлари "Пилвамаа, Тартумаа ҳамда Вирумаа"ларда бўлиб ўтади, дейилади бош штаб ахборотномасида. 

Маъмурият маълумотларига биноан, "Польшанинг Су-22 қирувчи-бомбардимончи самолётлари, АҚШнинг F-15 қирувчилари, CH-47 Chinook ҳарбий транспорт вертолётлари ва Bell V-22 Osprey конвертпланлари" ҳам ушбу машғулотларда қатнашади.

Бош штаб матбуот баённомасида машғулотлар режасига ойдинлик киритилмаган.

Шу йилнинг бошида Эстония бош вазири Таави Рийвас, 2016 йил 8-9 июль кунлари Варшавада бўлиб ўтажак НАТО саммитида, расмий Таллин Эстония ва қўшни давлатларда альянснинг ҳарбий базаларини барпо этиш таклифини илгари суришини билдирган эди.