Кўмир ишлаб чиқариш бўйича дунёнинг энг йирик компанияси Хитойнинг Shenhua Energy соф даромади жорий йил биринчи чорак якунларига кўра, 734 млн. АҚШ доллари (4,74 млрд. юань)ни ташкил этиб, 28,3 фоизга пасайган. Компаниянинг 2016 йил биринчи чорак молиявий натижаларига оид ҳисоботида шу ҳақда сўз юритилган. 

Компаниянинг ҳисобот давридаги умумий савдоси 4,6 фоизга тушиб, 6,1 млрд. долларни ташкил этган. Компаниянинг солиққача бўлган фойдаси 15,9 фоизга пасайиб, 1,39 млрд. доллар (9,025 млрд. юань)дан иборат бўлган.

Ҳозирги кунда Хитой кўмирдан энергия манбаси сифатида энг кўп фойдаланадиган мамлакатлигича қолмоқда. Бироқ ХХР раҳбарияти, ҳавонинг ифлосланганлик даражаси юқорилигига қарамай, кўмирдан фойдаланиш кўрсаткичини камайтиришга ваъда бериб келмоқда.

Хитойда биргина кўмир ёқилишидан ҳавога чиқариладиган ис гази Германиянинг жами иссиқхона газларидан кўплиги айтилган эди. Шу сабаб, Хитой ҳукумати ис газларини камайтириш юзасидан кенг қамровли режа ишлаб чиқмоқда. 

Хусусан, кўмир қазиб олиш саноатига сармоя киритишни камайтириш ҳамда ушбу соҳада банд ишчилар сонини кескин қисқартириш режалаштирилган.