Футбол бўйича Испания чемпионатининг 3та ўйинидан дисквалификация қилинган «Атлетико» Диего Симеоне дисквалификацияси борлигига қарамай жамоани гарнитур орқали бошқарганликда айбланиб, ярим йилга четлатилиши мумкин.

У «Малага»га қарши 35-тур ўйинида майдонга иккинчи тўпни қасддан ташлаб юборгани учун мавсумнинг қолган ўйинларидан четлатилганди.

Эндиликда Симеоне Ла-лиганинг 36-турида «Райо Вальекано»га қарши кечган учрашувда захира ўриндиғида қолдирилган жамоа сардори Габи Фернандес орқали қулоқчинли микрофон орқали жамоа ўйини борасида кўрсатмалар бериб тургани гумон остига олинган.

Ўйин давомида трибунада дарвозабонлар мураббийи Пабло Версельоне билан ёнма-ён ўтирган Симеоне у орқали Габига ўз гапларини етказган.

As нашри тарқатган фотосуратда Версельоне ва Габида қулоқчинлар борлиги кўрсатилган.

Агар Испания Футбол Федерацияси мавжуд вазиятни ўрганиб чиқиб, Диего Симеонени айбдор деб топса, у 4 тадан 20 тагача ўйинга четлатилиши мумкин. Бу деярли ярим йил давомида Симеоне ўйинларни томошабинлар қаторида кузатиши керак, дегани.

Мадрид клуби бошқаруви директори Клемент Валверде вазиятга биттагина гап билан изоҳ берди: — «Мен айтишим мумкин бўлган ягона нарса — Симеоне қулоқчинлардан фойдаланмаган».

Маълумот учун, «Атлетико» Испания Ла Лигасида «Барселона» билан бир хилда очко жамғариб, чемпионлик учун курашни давом эттирмоқда. 36-тур доирасида клуб «Райо Вальекано» устидан 1:0 ҳисобида зафар қучганди.