Италия А Сериясининг 36-турида «Женоа» Римнинг «Рома» жамоасини қабул қилди.

2 май куни Генуя шаҳридаги «Луиджи Феррарис» стадионида ўтказилган учрашув меҳмонларнинг 3:2 ҳисобидаги ғалабаси билан якунланди. Ўйиннинг 6-дақиқасида Муҳаммад Салоҳ меҳмонларни олдинга олиб чиқди. Мезбонлар сафида Панайотис Тахцидис ҳисобни тенглаштирди. Леонардо Паволеттининг голи эса ҳисобни 2:1 кўринишига келтирди. Ўйиннинг 59-дақиқасида захирадан майдонга туширилган 39 ёшли Франческо Тотти 77-дақиқада ҳисобни тенглаштирувчи гол муаллифи бўлди. Стефан Ал-Шаъровий эса 87-дақиқада ғалаба тўпини киритди.

Қайд этиш керак, Тоттининг майдонга тушиши кетма-кет тўртинчи ўйинда «Рома»га муваффақият келтирди. У аввалига «Аталанта» билан ўйинда бир гол уриб, жамоасини мағлубиятдан қутқариб қолган бўлса, кейинроқ «Торино» билан ўйинда дубл қайд этиб, «Рома»га 3 очко тақдим этди. «Наполи»га қарши марказий ўйинда эса, Тотти майдонга тушгачгина римликлар ғалаба голини нишонлади. Шунингдек, Тотти «Болонья» майдонида кечган ўйинда захирадан ўйинга қўшилиб, «Рома»га 1 очко келтирган голга муаллифлик қилганди.

Шу тариқа, Рим клуби очколари сонини 74 тага етказиб олди. 36-турнинг сўнгги ўйинида «Наполи» «Аталанта»ни енгиб, иккинчи ўринни сақлаб қолди.

«Женоа» 53 очко билан 12-ўринни эгаллаб турибди.

Кейинги тур учрашувини «Рома» 8 май куни ўз майдонида «Кьево»га қарши ўтказади, «Женоа» эса шу куни «Сампдория» майдонига сафар қилади.

Женоа - Рома - 2:3 (1:1)
Голлар: Салоҳ 6 (0:1). Тахцидис 13 (1:1). Паволетти 65 (2:1). Тотти 77 (2:2). Ал-Шаъровий 87 (2:3).
Женоа: Ламанна, Бурдиссо, Иццо, Фьямоцци (Капель, 71), Муньос, Лаксальт, Жамайли, Тахцидис (Маркезе, 62), Ринкон, Паволетти, Сусо (Пандев, 82)
Рома: Щесни, Рюдигер, Майкон (Жеко, 66), Манолас, Динь, Салоҳ (Зуканович, 88), Ал-Шаъровий, Стротман, Найнгголан, Де Росси, Перотти (Тотти, 60)
Огоҳлантиришлар: Ринкон, 73; Лаксальт, 79; Маркезе, 90 - Тотти, 72; Де Росси, 83; Строотман, 90.