«Лестер» ҳужумчиси Жейми Варди жамоаси Англия чемпионлигини қўлга киритганидан сўнг ҳиссиётлари билан ўртоқлашди.

«Бу ақлбовар қилмас туйғу. Бундайини аввал ҳеч қачон ҳис қилмаганман. Ўтган йили премьер-лигада қолиш учун тиришиб ҳаракат қилгандик, энди шанба куни  совринни бошимиз узра кўтарамиз. Шу воқеалардан сўнг ҳар бир футболчи ва клуб ходими қанчалик меҳнат қилганини тушунасан.

Бу буюк клубнинг ўз тарихидаги энг йирик натижаси, биз бу тарихнинг бир қисми бўлганимиздан бахтиёрмиз. Бу ғалабага айнан шу йигитлар билан эришганимиз, натижани янада қадрлироқ қилади. Бу меҳнатларимиз самараси», - дейди Варди.

3 майга ўтар кечаси «Челси» «Тоттенҳэм»га қарши ўйинда 2:2 ҳисобида дуранг ўйнади ва бу орқали «шпорлар»нинг кейинги 2 турда қандай натижалар қайд этилишидан қатъи назар «Лестер»га ета олмаслиги ва биринчи ўринга чиқа олмаслигини таъминлади.