Токио университети мутахассислари инсон терисига ёпиштириш мумкин бўлган дисплей ишлаб чиқишди. Фототасвир, ҳатто видеоларни ҳам намойиш этиш имконини берувчи дисплейнинг қалинлиги бир миллиметрнинг уч юздан бир қисмига тенг. 

Муаллифлар мазкур технологиянинг келгусидаги ривожи мода ва кийимлар ишлаб чиқариш соҳаларида янги йўналишларни очишига ишончлари комил. Бу ҳақда NHK телеканалига асосланиб ТАСС хабар берди. 

Ўта юпқа дисплейда кўрсатилиши мумкин бўлган тасвирлар ҳажми ҳозирча чегараланган. Бироқ токиолик олимлар келгусида улар орқали ҳатто телекўрсатувларни ҳам узатилишини маълум қилди. 

Бундай дисплейлар одам терисига, масалан, кафтнинг ташқи томонига, мутлақо текис ва ҳеч бир чизиқсиз ёпишади. Олимларнинг фикрига кўра, яқин келажакда ўз қўлида митти телевизор ёки видеотелефон экранини олиб юриш урфга айланади.