Кения ҳукумати браконьер (ўғри-овчи)лар томонидан ўлдирилган 6700 та филнинг мусодара этилган тишларини ёқиб юборди. 

100 тонна фил тишидан 11 та катта гулхан ясалди. Уларнинг биттасига президент Ухуру Кениата шахсан ўзи олов қалади. Бундан ташқари, гулханда 1350 килограмм каркидон шохи ҳам ёқилди.

Ушбу ҳаракатлар орқали Кения ҳукумати филларни даромад учунгина нобуд этувчи браконьерларга қарши курашини намойиш этди. 

Юз миллионлаб долларлик фил суяклари ҳамда каркидон шохларининг ёқилишидан олдин Африка давлатлари раҳбарларининг учрашуви бўлиб ўтган эди. Маълум бўлишича, улар ва ниҳоят  ноқонуний савдога чек қўйишни қатъий режалаштирган. 

Бироқ суякларни ёқиш маросимига норозилиги билдирганлар ҳам бўлди. Уларнинг фикрига кўра, мусодара этилган суякларнинг йўқ қилиниши нархнинг ошишига олиб келади. Бу эса браконьерларни яна янги қотилликлар сари етаклаши мумкин.