Россия Федерацияси президенти Владимир Путин 30 кун давомида сабабсиз ишга келмаган ва сайловчилари билан алоқаларини йўқотган Давлат думаси депутатларини мандатидан маҳрум этиш тўғрисидаги қонунни имзолади. Ҳужжат нусхаси ҳуқуқий ахборотга оид расмий интернет-порталида жойлаштирилган. 

«Федерация кенгаши ва Давлат думаси аъзоси мақоми тўғрисида»ги қонунга киритилган тузатишларга кўра, Давлат думаси аъзоси 30 ёки ундан ортиқ иш куни мобайнида вазифасини бажармаса ёки иш жойига келмаса депутатлик мандатидан ўзи аъзо бўлган фракция ёки парламент қўмитаси ташаббусига биноан Дума қарори билан маҳрум этилиши мумкин. 

Депутатни ваколатларини тўхтатиш бўйича расмий асосни эса Дума ахлоқ комиссияси тузиб чиқади. 

Давлат Думаси ҳужжатни 22 апрель куни қабул қилган, 27 апрелда Федерация кенгаши томонидан маъқулланган эди.