АҚШ президентига Республикачилар партиясидан номзод, миллиардер Дональд Трамп ҳамда Демократчилар партиясидан номзод,  Вермонт штатидан сенатор Берни Сандерс 3 майда АҚШнинг Индиана штатида ўтган праймеризда ғолиб бўлдилар. Бу ҳақда ТАСС ахборот агентлиги хабар бермоқда.

Овозларни ҳисоблаш ҳали якунига етмаган бўлсада, ОАВ прогнозларига кўра, Трамп бу штатда ўзига ғолибликни таъминлаб қўйди. Айни вақтда у 54 фоиз овоз йиққан. 2-ўринни Техас штатидан сенатор Тед Круз (32 фоиз) эгалламоқда. Юқори учликдан, шунингдек, Огайо губернатори Жон Кейсик (10 фоиз) ҳам жой олди.

Шунингдек, Берни Сандерс ҳам бу штатда ғолибликни қўлга киритди. Тўлдирилган бюллетенларнинг 68 фоизи қўлдан ўтказилгандан кейин, Сандерс 53,2 фоиз овоз, Клинтон эса 46,8 фоиз овоз тўплагани маълум бўлди.