Туркиянинг жануби-шарқидаги Мардин вилоятидаги Дерик тумани ҳудудида жойлашган жандармерия бошқармасида юз берган портлаш туфайли 1 нафар ҳарбий хизматчи ҳалок бўлди ва яна 5 нафар киши жароҳатланди. Бу ҳақда Туркия ҳарбий бош штаби маълумотида келтирилган.

"4 май куни Мардин вилоятидаги Дерик туманидаги жандармерия постида, ҳарбий хизматчилар ётоқхонаси ҳудудида портлаш содир этилди. Бу портлаш Курдистон ишчилар партияси томонидан автомобилга ўрнатилган портловчи қурилма орқали амалга оширилди. Натижада 1 ҳарбий хизматчи ҳалок бўлган ва ҳарбийларнинг оила аъзолари бўлган кишилардан 5 нафари жароҳатланган", дейилади хабарда.

Туркияда ҳукумат ва Курдистон ишчилар партияси ўртасидаги зиддиятлар 2015 йилнинг ёзида янгиланди. Ўтган вақт ичида курдлар билан юз берган тўқнашувлар туфайли ҳалок бўлган ҳарбийлар ва полициячилар сони 400 нафардан ортган. Туркия президенти Ражаб Тойиб Эрдўған берган маълумотга кўра, ўтган вақт ичида 5 мингдан ортиқ курд жангариси йўқ қилинган. Курдистон демократик партияси раҳбари эса ҳалок бўлганлар орасида юзлаб тинч аҳоли вакиллари бўлганини билдирган.