Туркияда ҳукмрон партия ҳисобланувчи Адолат ва тараққиёт партиясининг навбатдан ташқари қурултойи 22 май куни ўтказилади. Бу ҳақда ҳукумат вакилига асосланган ҳолда Reuters агентиги хабар тарқатган.

Бу маълумот мамлакат бош вазири Аҳмет Довутўғлининг истеъфога чиқиши мумкинлиги ҳақидаги хабарлар фонида пайдо бўлди.

4 май куни маҳаллий нашрларда Адолат ва тараққиёт партиясининг навбатдан ташқари қурултойи ўтказилиши ва шу билан бирга Аҳмет Довутўғли бу лавозимга ўз номзодини кўрсатмаслиги ҳақида хабарлар тарқалган эди.

Бугун NTV телеканали ўз манбаларига асосланган ҳолда, Аҳмет Довудўғлининг 5 май куни ўз истеъфосини эълон қилиши хақида хабар қилди.

Бош вазирнинг истеъфога чиқиши ҳақидаги хабарлар туфайли турк лираси кескин равишда қадрсизланган.

Аҳмет Довутўғли 2014 йилдан бери Туркия бош вазири лавозимини эгаллаб келади. Сўнгги вақтларда Эрдўған ва Довутўғли ўртасида курдлар муаммоси ҳамда ҳукуматни танқид қилувчиларни таъқиб қилиш масалалари борасида зиддиятлар юзага келган. Шунингдек, сиёсатчилар миграция муаммоси масаласида қарама-қарши фикрларда бўлиб келишмоқда.

Экспертларнинг фикрича, агар Довутўғли истеъфога чиқадиган бўлса, унинг ўрнига келадиган бош вазир Эрдўған юритаётган сиёсатга қарши бориши ва оз бўлсада мустақил сиёсат юрита олиши даргумон бўлади.