«Реал» жамоаси президенти Флорентино Перес Зинедин Зиданни кейинги мавсум учун ҳам жамоа бош мураббийи лавозимида қолдиришга қарор қилган. Бу ҳақда As хабар тарқатган.

«Флорентино бу бўйича бир неча ҳафта олдин қарор қабул қилиб бўлган. Бу жамоанинг ЕЧЛ финалига чиқиши билан боғлиқ эмас», – дея маълумот берган мадридликлар клуби президентига яқин манба.

Қайд этилишича, Пересга жамоада Зидан бошқарувидан кейин юзага келган муҳит маъқул келган.

«Зидан «Атлетико»дан қабул қилинган мағлубиятдан кейин қийин даврни бошдан кечиришига тўғри келди. Аммо Перес мураббийнинг матонатидан яхши таассурот олган ва унинг жамоани оғир вазиятдан олиб чиққанини қадрлайди», – дейди манба.

Эслатиб ўтамиз, шу йилнинг бошида Зидан Рафаэль Бенитес жамоа билан қайд этган қониқарсиз натижалар туфайли унинг ўрнига мавсум охиригача бош мураббий сифатида тайинланган, мавсум охирида у билан 2019 йилгача битим тузилиши мумкинлиги айтилганди.