Сурия президенти Башар Асад Россия раҳбари Владимир Путинга Иккинчи жаҳон урушидаги ғалабанинг 71 йиллиги муносабати билан йўллаган табрикномасида Ҳалабдаги вазиятни "Улуғ ватан уруши вақтидаги Сталинград қамали" билан қиёслаган. Бу ҳақда SANA агентлиги хабар тарқатган.

"Ҳалабдаги вазият, шунингдек, Суриянинг кўплаб шаҳарларидаги вазият Сталинград қамали вақтидаги вазиятга яқин.  <...> Биз тажовузкор кучларни бутунлай маҳв этиш ҳамда Сурияда душманлар устидан ғалаба қозонишдан бошқасига рози бўлмаймиз", дейилган телеграмма матнида.

Бундан олдинроқ, Германия ТИВ раҳбари Франк Вальтер Штайнмайер Германия томони Ҳалабда тинчлик сулҳ тузилишини қутлаши ҳақида маълум қилганди.

Россия ва АҚШ томони Ҳалабда ўт очишни тўхтатиш бўйича битим тузган ва бу сулҳ 5 май кунидан бошлаб кучга кирган.