Британиянинг "Сейбр" патруль катери АҚШнинг "Флорида" атом сув ости ракета ташувчисини Гибралтарга яқинлашишига халақит қилган "Рио Седена" испан қўриқчи кемаси томон сигнал ракеталари билан огоҳлантирувчи ўт очгани маълум бўлди. Бу ҳақда The Sun британ газетаси хабар бермоқда.  

"Бу испанлар учун нафақат хавфли ўйин, балки АҚШ ҳарбий-денгиз кучларига бундай нафрат билан қараш НАТО бўйича иттифоқдошга муносиб эмас", деб Буюк Британиянинг денгизорти ҳудуди ҳисобланувчи Гибралтарнинг юқори лавозимли амалдори сўзларини келтирмоқда газета. 

Нашр маълумотларига кўра, испан кемаси АҚШ сув ости кемасининг йўлини икки марта тўсган ва "Сейбр" ҳар гал огоҳлантирувчи ўқ узган. Бу воқеа апрель ўрталарида юз берган ва газетанинг маълум қилишича, Қироллик флоти раҳбариятидаги манбалар бу ҳолатни тасдиқлашган.   

"Флорида" сув ости кемаси охир-оқибат соҳилга яқинлаша олган ва кичик тўхташдан кейин шу куниёқ халқаро сув ҳудудларига қайтган.

"Огайо" туридаги SSBN-728 "Флорида" сув ости кемаси АҚШ ҲДК таркибига 1983 йилда киритилган. Дастлаб сув ости кемаси 24 та "Трайдент-1" ракетаси билан қуролланган бўлган. 2003-2006 йилларда "Флорида" "Томагавк" (22 отувчи қурилма ва 154 ракета) қанотли ракеталари ташиб юрувчи кемага қайта жиҳозланган ва SSGN-728 белгисини олган. 2011 йилда халқаро кучлар коалициясининг Ливиядаги ҳарбий операцияси давомида кемадан 90 дан кўпроқ "Томагавк" ракетаси отилган.