Италия бош вазири Маттео Ренцининг маълум қилишича, Англия чемпионатида «Лестер» жамоаси билан чемпион бўлган италиялик мутахассис Клаудио Раньери давлат мукофотига лойиқ иш қилди.

3 майга ўтар кечаси, АПЛнинг 36-тури доирасида «Челси» ва «Тоттенҳэм» жамоалари ўртасида 2:2 ҳисобидаги дуранг натижа қайд этилгач, «Лестер» муддатидан олдин чемпионга айланди. «Лестер» бу орқали ўз тарихида илк марта мамлакат чемпионлигига эришди. Раньери инглиз жамоасига 2015 йилнинг июлида бош мураббий сифатида тайинланганди. 64 ёшли мутахассис бундан олдин ўзи ишлаган кўплаб жамоаларда бирон марта лигада ғолиб бўлмаганди.

«Мен Италия президенти Сержо Маттареллега Клаудио Раньерини мукофотлашни таклиф этаман. Биз бу буюк мураббийнинг хизматларини қадрлашимиз ва уни кераклича эътироф этмоғимиз, у қилган ишни барча тан олиши керак», – дея Ренцининг сўзларини келтирган Football Italia нашри.