АҚШ давлат котиби Жон Керри Украина ортда қолган қишдан бери Россия газига аввалгидек қарам эмас, деб ҳисоблайди. Давлат департаменти раҳбари 4 май куни ЕИнинг хорижий ишлар ва хавфсизлик сиёсати бўйича раиси Федерико Могерини билан бўлиб ўтган учрашувдан олдин шундай фикр билдирди. 

"Биз Украинанинг Россия газига муҳтожлигини камайтиришга ёрдам бердик. Илк маротаба ўтган қишда Украина Россиядан кўра кўпроқ Европадан газ олди", - деди Керри. 

Керрининг таъкидлашича, бу "ҳамкорликдаги стратегия" туфайли рўй берди. 

"Укртрансгаз" компанияси президенти Игорь Прокопив Украина реверсив жўнатиш орқали (ҳаракат йўналишини тескари ҳайдаш) Россия газини қабул қилаётганини тан олди.

"Жуда яхши тушуниб турибмизки, реверс - Европага керак бўлмаган Россия гази ва у Украинага Европа нархларида қайтмоқда", - деди Прокопив. 

Ўтган йилнинг декабрида мамлакатнинг собиқ бош вазири Арсений Яценюк "Россия газига гиёҳвандларча қарамлик"ка нуқта қўйилгани ҳамда 10 йилдан сўнг мамлакатнинг ўзи газ экспорт қилишини таъкидлаган.