Португалияда бир эркак селфига тушмоқчи бўлиб, 16-асрда яшаган қиролнинг 126 йиллик ҳайкалини чил-чил қилди, деб хабар бермоқда РИА “Новости” ахборот агентлиги.

Эркак Лиссабондаги Росиу темир йўл вокзалида ўрнатилган португал қироли Себастьян l’нинг ҳайкали асосига чиққан ва кўполлик қилиб, ҳайкални туртиб, ерга тушириб юборган. Бу воқеа 3 май яримтун атрофида содир бўлган.

Омадсиз фотоҳаваскор бу қилмишидан сўнг воқеа жойидан яширинишга ҳаракат қилган, бироқ полициячилар уни тутиб олганлар. Эркак ҳибсга олинди, у кейинроқ суд олдида жавоб беради.

Ҳайкалда қирол Себастьян l қўлида қалқон ва қилич ушлаб турган ҳолида тасвирланган. Ҳайкал вокзал биносига кираверишда, аркалар ўртасида 1890 йилдан бери турганди.