Турк лираси курси мамлакат бош вазири истеъфоси тўғрисидаги хабарлардан сўнг кескин тушиб кетди

Иқтисодиёт 05 Май 2016 3481

Турк лирасининг АҚШ долларига нисбатан расмий курси сўнгги саккиз йил мобайнида энг паст кўрсаткичга тушиб кетди. Бунга Туркия бош вазири Аҳмет Довудўғлининг истеъфога чиқиши ҳақидаги миш-мишлар сабаб бўлган деб хабар қилмоқда Bloomberg агентлиги.

Хусусан, мамлакатнинг 10 йиллик муддатга чиқарган давлат облигациялари даромадлилиги 32 базис пунктга сакраган ва 2015 йил августидан бери илк маротаба катта ўсишни намоён этган. Туркиянинг Borsa Istanbul 100 фонд бозори кўрсаткичи эса бешинчи кундирки пасайишда давом этиб, 1,5 фоизга тушиб кетган. 

Шу билан бирга 4 май куни турк миллий валютаси лира 3,9 фоизга қадрини йўқотган. Bloomberg экспертлари Туркия иқтисодиётидаги бу каби салбий кўринишларни мамлакат президенти Эрдўған ва бош вазири Довудўғли ўртасидаги келишмовчилик билан боғламоқда. 

Бундан аввал, NTV телеканали ўз манбаларига асосланган ҳолда, Аҳмет Довудўғлининг 5 май куни ўз истеъфосини эълон қилиши хақида хабар қилган эди.

Кўпроқ янгиликлар