Оддий автомобилларни электркарларга айлантириш билан шуғулланадиган Американинг Electric GT компанияси жаҳонда илк бор Ferrari – 308 GTE спорткарининг электрлаштирилган русумини ишлаб чиқди. Машина машҳур фирманинг 1978 йилги 308 GTS модели негизида ишлаб чиқилган. Компания уни ёқилғи тарқалиши туфайли мотор қисми ёниб кетган ҳолда сотиб олган эди. 

Америкаликлар Ferrari кузови ва салонини тўлиқ тиклаб, 2,9-литрли 240 от кучига эга ёниб кетган мотор ўрнига 415 от кучли электр қувват ускунасини жойлаштирган. Машина 1990 йиллар бошида ишлаб чиқарилган Porsche 911га ўрнатилган беш босқичли механик узатмалар қутиси ёрдамида ҳаракатланади.

 Electric GT вакилларининг сўзларига кўра, «механик» қути танланишига «Ferrari’ни бошқаришдан ҳузур-ҳаловат бахш этиш истаги» сабаб бўлган. Катта айланиш лаҳзаларини кўтара олгани учун ҳам айнан «Порше» трансмиссияси танланган. 

Электромоторни 30 киловатт-соатлик батареялар қувват билан таъминлайди. У бир марта захира тўплагач 160 км.гача юра олади. Кейинчалик машиналарни 2 марта кучлироқ батареялар билан жиҳозлаш режалаштирилмоқда. Янги ишланманинг вазни оригинал Ferrari 308 GTS’дан 300 кг.га оғирроқ бўлиб, 1,5 тоннани ташкил этмоқда. 

Электрокар Калифорниянинг Монтерей шаҳрида бўлиб ўтадиган аукцион доирасида Mazda Laguna Seca Raceway автодромида намойиш этилади.