Американинг мусиқий журнали Billboard 2015 йилда энг кўп даромад олган 40 нафар қўшиқчи ва гуруҳ рўйхатини чоп этди. Биринчи ўринни ўзининг 73,5 миллион долларлик даромади билан Тейлор Свифт эгаллади. 

Рўйхатнинг 2-ўрнини 39,8 миллион доллар маблағ билан кантри-хонанда Кенни Чесни забт этди. 3-поғона британиянинг The Rolling Stones гуруҳига насиб этди. Гуруҳнинг ўтган йилдаги даромади 39,6 миллионни ташкил этади. Шунингдек, рўйхатнинг биринчи ўнталигидан Билли Жоэл (31,7 миллион), One Direction (24,2 миллион), U2 (21,8 миллион) ва Адель (20,5 миллион) ўрин эгаллашди.

Хонандалар тўплаган асосий даромад манбаи – шубҳасиз, концертлар. Тейлор Свифт гастролларидан 61,7 миллион доллар, альбомлардан эса — 7,2 миллион доллар даромад олган. 4,1 миллион долларни муаллифлик қўшиқларидан, 564 минг долларни эса тармоқлардаги мусиқа сотувидан ишлаб олган. 
Адель эса 2015 йилда ҳеч қандай концерт бермай туриб, биргина альбоми сотувидан 16 миллион долларга яқин даромад тўплаган. 

Шунингдек, рейтингда Мадонна — 14-ўрин (12,7 миллион доллар), Бритни Спирс — 22-ўрин (10,6 миллион доллар), Пол Маккартни эса 33-ўринни (7,1 миллион доллар) қайд этди.

Billboard тузган рейтинг Forbes журналининг маълумотларидан фарқ қилади. Forbes рейтинги бўйича Тейлор Свифт 80 миллион доллар даромад тўплаган бўлиб, рўйхатнинг иккинчи поғонасини эгаллаган. Биринчи ўрин эса хонанда Кэти Перрига (135 миллион доллар даромад) насиб этган.