5 май куни Буюк Британияда New Day газетасининг охирги сони нашр қилинди. Бу газета бор-йўғи 9 ҳафта давомида чоп этилган.

"Ҳаёт қисқа, шунинг учун уни яхшироқ ўтказ" шиори остида нашр қилинган газета муассисларнинг ишончини оқламаган.

Ҳар кунлик тиражи 200 минг нусха бўлиши режалаштирилган газета амалда кунига 40 минг нусхадан сотилган.

New Day муҳаррири Элисон Филипснинг айтишича, газетанинг молиявий жиҳатдан ўзини таъминлай олиши учун барча чоралар қўллаб кўрилган аммо бунинг уддасидан чиқилмаган.

Шу йилнинг бошида Британияда бошқа бир газета, муассиси россиялик тадбиркор Александр Лебедев бўлган Independent газетасининг қоғозли версияси ёпилишига қарор қилинганди. The Independent’га эгалик қилувчи ESI Media компаниясининг маълум қилишича, март ойидан онлайн шаклга ўтган газета Буюк Британияда тўлиқ онлайн шаклига ўтган биринчи миллий нашр бўлди.