Асли Навоий вилоятидан бўлган Гулруҳ Бозорова (исм-фамилиялар ўзгартирилган) ҳаётда тўғри йўлни эмас, эгрисини танлади. Ҳали ўттиз ёшни қаршиламай туриб учинчи бор суднинг қора курсисидан жой олишга улгурди. У 2012 йил ва 2013 йилда содир этган жиноятлари учун Амнистия актига биноан жазодан озод этилган эди. Бу ҳақда “Огоҳ” нашри ёзмоқда.

Гулруҳ Тошкентга кириб келганида кун яримдан ошиб қолганди. Шу боис тезроқ ижарага турар жой топишни режалаштирди. Таниш билишларига қўнғироқ қилиб, Яшнабод туманида Матлуба деган аёл уйига ижарага қўйиши мумкинлигидан хабар топди. Кунни кечиктирмай ўша ерга бориб жойлашгач, хонадонда Зулфия исмли қиз билан яшай бошлади. 

Хонадоши Зулфия ижарада турадиган уйда унинг ҳамма нарсаси шундоққина турарди. Шунинг учун аввалига стол устида турган планшетини олиб, у ёқ-бу ёғини кўрган бўлди. Гулруҳнинг эски қилиғи қўзиб, хонадошига тегишли 1200 АҚШ доллари, 600000 сўм пулларни, баҳоси 400 АҚШ доллари бўлган “Техт” русумли бир дона планшетини, 480 АҚШ доллари бўлган 4 дона дастурхон, 200 АҚШ доллари бўлган 4 дона сочиқ, 450000 сўмлик чамадон, 320000 сўм бўлган 4 дона “Багински” русумли гулдон, 250000 сўмлик қон босимини ўлчаш мосламаси  ва шу каби бошқа нарсаларини ўғирлаб, Зулфия Юнусовага жами 13689677 сўм миқдорида моддий зарар етказиб, воқеа жойидан яширинди. 

Бироқ Гулруҳ Бозорова узоққа кета олмади. Жабрланувчиларнинг аризасига биноан ушбу ўғрилик юзасидан олиб борилган суриштирув-қидирув тадбирлари бесамар кетмай, ўғри аёл қўлга олинди.